Campo de acción
Fundación Lonxanet centra o seu campo de actuación na pesca artesanal e nas poboacións dependentes desta actividade económica. Algunhas das razóns:
- Máis de 200 millóns de persoas no mundo practican a pesca artesanal.
- Proporciona alimento a máis de 2.000 millóns de persoas.
- Aporta o 50% de pescado para o consumo humano no mundo.
- Xera emprego local, fixa poboación ao territorio e dinamiza social e economicamente a moitas poboacións costeiras, fluviais e lacustres dependentes destes ecosistemas.
- Contribúe á sostibilidade social, ambiental e económica máis que ningún outro sistema produtivo pesqueiro (semi-industrial ou industrial).
- A maioría son poboacións rurais que viven en países en desenvolvemento e emerxentes cun Índice de Desenvolvemento Humano moi por debaixo da media.
Pese a estes feitos, trátase dunha actividade económica en regresión e especialmente vulnerable ante a falta de atención e apoio por parte das políticas públicas de moitos países. Dita desatención xera abandono da actividade, pobreza, emigración, desarraigo e marxinación.
Lonxanet actúa sobre as condicións que debilitan a pesca artesanal co propósito de fortalecela e consolidala coma un sistema produtivo que contribúa á sostibilidade social, económica, ambiental e política das comunidades pesqueiras.